“Андижон” клуби етакчиларидан бири Суҳроб Бердиев ҳам бошқалар қатори қишки ўқув-машғулот йиғинида астойдил меҳнат қилмоқда.

У жамоанинг Суперлигага қайтишида анча тер тўкди. Футболчи жамоасининг янги мавсумга тайёргарлиги ва бош мураббий ҳақида ўз фикрлари билан ўртоқлашди.

"Машғулотларни кўтаринки кайфиятда бошлаганмиз ва бу бизнинг мураббийлар алмашинувидан кейинги биринчи йиғинимиз. Ҳаммаси режа асосида давом этяпти. Янги бош мураббий – Александр Хомяковнинг ишини билардик ва мана, энди биргаликда ишлаяпмиз.

Ҳозирги тайёргарлигимиз жуда яхши, футболчилар билан маза қилиб шуғулланяпмиз.

Ҳамма хордиқдан қайтган. Эски спорт формамизни тиклаш жараёни кетяпти, барчаси яхши. Кунига икки маҳалдан шуғулланяпмиз. Тўп билан ҳаракат қиляпмиз ва тренажёр залида ҳам ишлаяпмиз. Мураббий тактикаларини қўллаяпти ва қизиқарли янгиликлар бўляпти. Барчаси ажойиб ва кўнгилдагидек.  

Январь ойида янги ўйинчилар қўшилишини айтишяпти. Жамоамизда рақобатбардош таркиб бўлади ва бундай ашаддий мухлисларимиз кўз ўнгида ўйнашимиз бизга қўшимча куч-қувват беради. Кўпроқ ғалабалар қозониб, Суперлигада ҳам “Андижон”нинг ўз ўрни борлигини кўрсатиб қўямиз. Бутун жамоамиз билан олдимизга қўйиладиган мақсад учун курашамиз", - дейди Суҳроб Бердиев.

“Андижон” матбуот хизмати.