“Andijon” klubi yetakchilaridan biri Suhrob Berdiyev ham boshqalar qatori qishki o‘quv-mashg‘ulot yig‘inida astoydil mehnat qilmoqda.

U jamoaning Superligaga qaytishida ancha ter to‘kdi. Futbolchi jamoasining yangi mavsumga tayyorgarligi va bosh murabbiy haqida o‘z fikrlari bilan o‘rtoqlashdi.

"Mashg‘ulotlarni ko‘tarinki kayfiyatda boshlaganmiz va bu bizning murabbiylar almashinuvidan keyingi birinchi yig‘inimiz. Hammasi reja asosida davom etyapti. Yangi bosh murabbiy – Aleksandr Xomyakovning ishini bilardik va mana, endi birgalikda ishlayapmiz.

Hozirgi tayyorgarligimiz juda yaxshi, futbolchilar bilan maza qilib shug‘ullanyapmiz.

Hamma xordiqdan qaytgan. Eski sport formamizni tiklash jarayoni ketyapti, barchasi yaxshi. Kuniga ikki mahaldan shug‘ullanyapmiz. To‘p bilan harakat qilyapmiz va trenajyor zalida ham ishlayapmiz. Murabbiy taktikalarini qo‘llayapti va qiziqarli yangiliklar bo‘lyapti. Barchasi ajoyib va ko‘ngildagidek.  

Yanvar oyida yangi o‘yinchilar qo‘shilishini aytishyapti. Jamoamizda raqobatbardosh tarkib bo‘ladi va bunday ashaddiy muxlislarimiz ko‘z o‘ngida o‘ynashimiz bizga qo‘shimcha kuch-quvvat beradi. Ko‘proq g‘alabalar qozonib, Superligada ham “Andijon”ning o‘z o‘rni borligini ko‘rsatib qo‘yamiz. Butun jamoamiz bilan oldimizga qo‘yiladigan maqsad uchun kurashamiz", - deydi Suhrob Berdiyev.

“Andijon” matbuot xizmati.