"ПСЖ" ҳужумчиси Лионель Месси парижликлар клуби билан шартномасини узайтиришга яқин турибди, деб ёзади инсайдер Николо Скира ўзининг Twitter саҳифасида.
Манбага кўра, янги шартнома яна бир йилга узайтириш имконияти билан 2024 йилгача мўлжалланган бўлади. 35 ёшли аргентиналик футболчи 40 миллион евро ишлаб олади.
"ПСЖ" бош мураббийи Кристоф Галтье аввалроқ клуб Месси билан шартномани узайтириш борасида музокаралар олиб бораётганини тасдиқлаган эди.
Ҳужумчи 2021 йилнинг августидан буён Франция жамоасида тўп сурмоқда. Жорий мавсумда у барча мусобақаларда 19 та ўйинда майдонга тушиб, 12 та гол урди ва 14 та голли узатмани амалга оширди. Месси Аргентина терма жамоаси билан 2022 йилда Қатарда бўлиб ўтган жаҳон чемпионатида ғолиб чиқди.
Мессининг "ПСЖ" билан амалдаги шартномаси 2023 йилнинг 30 июнига қадар тузилган.
