Хабарингиз бор, бугун Саудия Арабистони пойтахти Ар-Риёддаги “Қирол Фаҳд” стадионида Тошкент вақти билан соат 23:59 да Испания суперкубоги финалидан ўрин олган баҳсда Мадриднинг “Реал” ва Каталониянинг “Барселона” клублари ўзаро беллашадилар ҳамда бутун дунё мухлислари янги йилдаги илк “эл-класико” гувоҳига айланишади.

Кўпчиликни мазкур жамоалар ўртасидаги қарама-қаршиликка оид статистик маълумот қизиқтиришини инобатга олган ҳолда, қуйида шунга тўхталишга қарор қилдик.

Бугунги “эл-класико” ҳисоб бўйича барча мусобақалардаги 285-ҳисобланади. Ортда қолган 284 та ўйиннинг 117 тасида “Барселона” ғалаба қозонган бўлса, “Реал” ҳисобида 105 та ютуқ бор. 62 та беллашувда эса жамоалар ўзаро муроса кўчасини танлаган. Тўплар нисбати – 493-461, каталонияликлар фойдасига.

Энг кўп “эл-класико” Ла-лигада кузатилган ва Испания миллий чемпионатларида “Реал” ҳамда “Барса” ўзаро 185-марта тўқнаш келган. Ушбу ўйинларнинг 77 тасида мадридликлар, 73 тасида эса “анорранглилар” зафар қучишган. 35 та баҳсда эса дуранг ҳисоби қайд этилган. Тўплар нисбати – 298 – 296, “Қироллик клуби” фойдасига.

Испания суперкубоги турнирида мазкур клублар шу кунгача 15 маротаба куч синашишган. Бугунгиси 16-тўқнашув бўлади. Ушбу 15 та учрашувдан 9 тасида “қаймоқранглилар” ғалаба қозонишган бўлса, каталонияликлар ҳисобида 4 та ютуқ бор. Яна 2 ўйинда эса дуранг қайд этилган. Тўплар нисбати – 33-20, “Реал” фойдасига.