“Шўртан” ҳамда “Андижон” жамоалари ўртасидаги баҳс якунига етганидан сўнг, одатга кўра матбуот анжумани бўлиб ўтди. Афсуски, йирик ҳисобда мағлуб бўлган “Андижон” жамоаси бош мураббийи Алекандр Аверьянов матбуот анжуманига ташриф буюрмади. Шу сабабли, фақатгина Эдгар Гесс ўйин ҳақидаги фикрлари билан ўртоқлашди.

— “Аввало, бугунги қўлга киритилган йирик ҳисобдаги ғалабадан жуда ҳам хурсандман ва шу ўринда шогирдларимга миннатдорчилик айтиб ўтмоқчиман”-дейди, “оқ бўрилар” бош мураббийи. — “Кўрсатган ўйнимиз ва қўлга киритган ғалабамиздан барча қониқиш ҳосил қилди. Ушбу ғалаба билан бизни тинимсиз қўллаб-қувватлаб турган ишқибозларимизни табриклайман!”

— Шогирдларингиз кўрсатган ўйинига қандай баҳо берасиз?
— Ўйин комбинацион тарзда ўтди. Уюштирган кўплаб ҳужумларимизни гол билан якунлай олдик. Шогирдларим барча кўрсатмаларимни аниқ бажаришди ва мен хоҳлаган футболни намойиш этишди.

— Рақиб ҳақида қандай фикрдасиз?
— “Бундай олиб олиб қараганда, биз баҳсга тайёр эдик. Чунки, рақибни “Бунёдкор” ва “Навбаҳор” жамоаларига қарши ўтказган ўйинлари видеодискини синчковлик билан томоша қилиб чиққандик. Шунинг учун биз ҳар томонлама ушбу баҳсга жиддий тайёргарлик кўргандик, қисқа қилиб айтганда, “қуролланган” эдик.

— Учрашув мобайнида шогирдларингизни хатоларини ҳам сездингизми?
— Албатта, хатолар ҳам кўзга ташланиб турди. Футболда ҳамма хато қилади. Лекин, асосийси биз ўз олдимизга қўйган мақсадимизнинг керакли қисмини бажара олдик ва ўша илдиз баҳс мобайнида ўз сўзини айтди.

— Кейинги баҳс “Пахтакор” жамоаси билан бўлиб ўтади. Айтингчи, ушбу баҳсга тайёргарлик қандай даражада олиб борилади. Бўлажак учрашувдан нималарни кутсак бўлади?
— Ҳозирча Ҳайит байрами сабабли футболчиларга қисқа муддатли дам берилди. “Пахтакор” билан ўйин турнинг марказий учрашуви бўлиши аниқ. Биз эгаллаб турган ўрнимизга мос ўйин намойиш этишимиз шарт! “Пахтакор” ҳақида гапирадиган бўлсам, бу жамоа бугунги кунда ўзини комбинацион ўйини билан ажралиб турадиган жамоа. Шунинг учун учрашув қизиқ бўлади деб ўйлайман ва мухлисларни стадионга чорлаб қоламан, чунки, улар жуда қизиқарли ва кескин курашларга бой бўлган учрашув гувоҳига айланишади.