Танлов баҳона ҳар хил мақолалар кўпайиб кетмоқда. Уларнинг аксарияти (балки деярли барчаси) олий лига, терма жамоамиз ва умуман мамлакат футбол муҳитига нисбатан танқидий руҳдаги мақолалардан иборат.
Қанчалик танқид қилмайлик, қанчалик айб қидирмайлик, айбдорларни топмайлик биз шунга лойиқмиз, бундан ортиғига эмас! Айнан ўта ланж, ғалабадан мағлубиятга мойиллиги юқори бўлган тарма жамоага, нотекис, остин-устин олий лигага, бир тийинга қиммат биринчи лигага лойиқмиз.
Бир куни маҳаллада бир гуруҳ футболсевар ёшларнинг суҳбатига гувоҳ булиб қолдим. Улар маҳаллий жамоамиз ўйинларини ёмонлаётган, футболчиларимиз тезлиги-ю тактикасини айтиб уларни “уч қўрғондан кўрсатаётган”, фақатгина биттаси жон-жахди билан жамоани ҳимоя қилаётган эди. “Ҳимоячи” бахсга нуқта қўйди:
− Сенларни гапиришга умуман ҳаққиларинг йўқ. Қачон жамоа ўйинини кўргани боргансан? Сен хақорат қилаётган жамоа учун бир тийин сарфлаганмисан? Ғалаба қилганда эл қатори хурсанд бўлишни ўрнига, э эртага барибир ютқазади дейдиган боласанлар, норози бўлишга ҳақиларинг борми?
Унинг гапларини умумий шовқин босиб кетди. Ҳамма ўзи билган маҳаллий футболчиларнинг маошлари ва агар ўша маошни ўзлари олишса қандай “кучли футболчи” бўлишлари мумкинлиги ҳақида зўр бериб гапирарди.
Кейинроқ у билан шу мавзуда гаплашиб қолганимда, “Командани яхши кўраман. Ўша эски стадионда ўйнаганда ҳам яхши кўрардим, ҳозир ҳам (эски стадионимизда табиий футбол бўлади, тўп дарахт шохларига тегиши ёки томга тушишими мумкин. Бунақанги Олий лига яна қаерда бўлиши мумкин деб болалар билан ҳазиллашардик)” деб таъкидлади. Ҳа, у футболни севади, журналистларимиз кўп маротаба айтиб ўтган профессионализм, маркетинг билан сариқ чақалик иши бўлмаслиги мумкин, у барибир ўз командасини севади. Уни ёмон гаплардан, ҳурматсизликдан асрашга ҳаракат қилади. Биз эса сиз билан фақат танқид қиламиз.
Яхшиси футболни чин дилдан севайлик. Севиклиларимизни асрайлик ва уларнинг ёнида бўлайлик. Мана шунинг ўзи ҳамма нарсага қодир. Мана шунинг ўзи профессионализмни ҳам, маркетингни ҳам олиб келади.
“Jadroo” никли мухлис, Рустам Ёдгоров.
