“Барселона” Ла Лига 19-тури доирасида “Жирона”га қарши кечган баҳсда 1:0 ҳисобида ғалаба қозонди.

Каталонияликлар барча мусобақалар доирасидаги ғалабали сериясини 8 ўйинга етказди. Жамоа 2023 йилдаги барча ўйинни ўз фойдасига ҳал қилди.

Шунингдек, жамоанинг мағлубиятсиз серияси 13 ўйинга етди. Сўнгги бор “Барселона” Чемпионлар Лигасида 26 октябрь куни “Бавария”га ютқазганди (0:3). Шундан кейинги 13 ўйинда 12 та ғалаба ва битта дуранг қайд этилди.

“Кўк-анорранглилар” Ла Лиганинг сўнгги уч ўйинида ўз дарвозаси дахлсизлигини сақлаб қолди. Жамоа Примера жорий мавсумининг 18 ўйинидан 14 тасида тўп ўтказиб юбормади.

“Барселона” дарвозасига фақат “Реал Сосьедад” (4:1), “Реал” (1:3), “Осасуна” (2:1) ва “Эспаньол” (1:1) йўл топа олган.

6 та ўтказиб юборилган гол — Европа топ-5 лигалари жорий мавсумидаги энг яхши натижа. Иккинчи ўриндаги “Ньюкасл” ўз дарвозасидан 11 та тўп олиб чиққан.

“Барселона” кейинги ўйинини 1 февраль куни “Бетис”га қарши ўтказади.