“Милан”, “Интер”, “Ювентус”, “Лацио” ва Япония терма жамоаларининг собиқ устози Алберто Дзаккерони реанимацияга тушиб қолди. La Gazette Dello Sport хабарига кўра, 69 ёшли италиялик ўз уйида содир бўлган бахтсиз ҳодиса туфайли ҳушини йўқотган.

Манбага кўра, Дзаккерони йиқилиб, боши билан урилган ва ҳушини йўқотган. Тез ёрдам машинаси уни зудлик билан Чезена шаҳридаги Маурицио Буфалини касалхонасига олиб борди. Аввалига унга мия чайқалиши ва бош жароҳати ташхиси қўйилган, бироқ ҳозирча ўзига келгани йўқ.

Италиялик мутахассис Италия, Япония, Хитой ва Бирлашган Араб Амирликларида ишлаб, 2019 йилда фаолиятини якунлаган.

1998/99 йилги мавсумда у "Милан" билан А Серия ғолиби бўлган, Япония терма жамоаси билан эса Осиё Кубоги (2011) ва Шарқий Осиё Кубоги (2013)да ғолиб чиққан.