Мартин Эдегор ўз интервьюларидан бирида Криштиану Роналдуни мақтади. Унга кўра, Роналду норвегиялик футболчига "Реал"даги муҳитга мослашиши учун катта ёрдам берган. "Арсенал" сардори 2015 йили 3 миллион фунт эвазига "Реал" томонидан харид қилинади. Эдегор Испанияга келганида бор-йўғи 16 ёшда эди. Табиийки, у испанчани билмаган. Аммо Мартиннинг бахтига "Реал" сафида инглиз тилини биладиган бир нечта футболчилар бор эди. Криштиану Роналду, Лука Модрич ва Тони Кроос инглиз тилида гапира олган.
24 ёшли "Арсенал" ярим ҳимоячиси Мартин Эдегор ўзининг футбол дунёсидаги илк саргузаштини шундай тасвирлайди: "Мен илк бор "Реал" кийиниш хонасига кирганимда футболчиларнинг менга қандай муносабатда бўлишини ўйлаётгандим. Мени ёш бола, испан тилини билмайди деб бир четга чиқариб қўймасмикин деб ҳадиксирардим. Аммо бу фикрим хато эди. Янги жамоадошларимнинг бари меҳрибон ва очиқкўнгил эди. Улар ичида Модрич, Роналду ва Кроослар инглиз тилини билар экан. Шу сабаб улардан кўпроқ қўллов олдим. Йигитлар менга ўз маслаҳатлари билан катта ёрдам беришди. Аммо уларининг ҳеч бири мени, ўз ўрнини олиб қўяди деб қайғурган дея олмайман. Айниқса, Роналду менга ўз укаси каби муомалада бўлди. У ҳар доим ёрдамга тайёр эди".
Мартин Эдегор "Реал" тарихида энг ёш дебют қилган футболчига айланган. У 2015 йилнинг май ойида, атиги 16 ёш 157 кунлигида Роналду ўрнига майдонга тушганди. Ўшанда "Реал" "Хетафе"ни 7-3 ҳисобида енгади. Аммо "Арсенал" сардорининг Испаниядаги фаолиятини омадли дея олмаймиз. Чунки у олти ярим йил давомида "қаймоқранглилар" сафида атиги 11 марта майдонга тушган холос. Чунки 24 ёшли футболчининг Мадрид жамоасидаги асосий даври ижараларда кечган. Уни 2021 йилнинг бошида "Арсенал" ижара асосида олиб келади. Ўша йилнинг ёзида эса 30 миллион фунт эвазига бутунлай сотиб олади. Кўпчилик, Эдегорнинг майдондаги бугунги ҳаракатларини Месут Ўзилга қиёслайди. Бу бежиз эмас, албатта...
ИСМАТОВ Ж.
