Martin Edegor o‘z intervyularidan birida Krishtianu Ronalduni maqtadi. Unga ko‘ra, Ronaldu norvegiyalik futbolchiga "Real"dagi muhitga moslashishi uchun katta yordam bergan. "Arsenal" sardori 2015 yili 3 million funt evaziga "Real" tomonidan xarid qilinadi. Edegor Ispaniyaga kelganida bor-yo‘g‘i 16 yoshda edi. Tabiiyki, u ispanchani bilmagan. Ammo Martinning baxtiga "Real" safida ingliz tilini biladigan bir nechta futbolchilar bor edi. Krishtianu Ronaldu, Luka Modrich va Toni Kroos ingliz tilida gapira olgan.
24 yoshli "Arsenal" yarim himoyachisi Martin Edegor o‘zining futbol dunyosidagi ilk sarguzashtini shunday tasvirlaydi: "Men ilk bor "Real" kiyinish xonasiga kirganimda futbolchilarning menga qanday munosabatda bo‘lishini o‘ylayotgandim. Meni yosh bola, ispan tilini bilmaydi deb bir chetga chiqarib qo‘ymasmikin deb hadiksirardim. Ammo bu fikrim xato edi. Yangi jamoadoshlarimning bari mehribon va ochiqko‘ngil edi. Ular ichida Modrich, Ronaldu va Krooslar ingliz tilini bilar ekan. Shu sabab ulardan ko‘proq qo‘llov oldim. Yigitlar menga o‘z maslahatlari bilan katta yordam berishdi. Ammo ularining hech biri meni, o‘z o‘rnini olib qo‘yadi deb qayg‘urgan deya olmayman. Ayniqsa, Ronaldu menga o‘z ukasi kabi muomalada bo‘ldi. U har doim yordamga tayyor edi".
Martin Edegor "Real" tarixida eng yosh debyut qilgan futbolchiga aylangan. U 2015 yilning may oyida, atigi 16 yosh 157 kunligida Ronaldu o‘rniga maydonga tushgandi. O‘shanda "Real" "Xetafe"ni 7-3 hisobida yengadi. Ammo "Arsenal" sardorining Ispaniyadagi faoliyatini omadli deya olmaymiz. Chunki u olti yarim yil davomida "qaymoqranglilar" safida atigi 11 marta maydonga tushgan xolos. Chunki 24 yoshli futbolchining Madrid jamoasidagi asosiy davri ijaralarda kechgan. Uni 2021 yilning boshida "Arsenal" ijara asosida olib keladi. O‘sha yilning yozida esa 30 million funt evaziga butunlay sotib oladi. Ko‘pchilik, Edegorning maydondagi bugungi harakatlarini Mesut O‘zilga qiyoslaydi. Bu bejiz emas, albatta...
ISMATOV J.
