"Реал Мадрид" бош мураббийи Карло Анчелотти жамоа вингери Винисиус Жуниор ФИФА талқини бўйича 2022 йилнинг энг яхши футболчиси номига номзодлар учлигига кирмагани ҳақидаги хабарга муносабат билдирди. Эслатиб ўтамиз, якуний рўйхатга Лионель Месси, Килиан Мбаппе ва Карим Бензема киритилган.
“Винисиус ФИФА талқини бўйича йилнинг энг яхши футболчиси бўлишга номзодлар қаторида эмасми? Мен буни тушунмаяпман. Бу хато бўлса керак, тўғри тушундимми?”, – деди Анчелотти матбуот анжуманида кулиб.
Эслатиб ўтамиз, Винисиус ўтган мавсумда "Реал" сафида барча турнирларда 21 та гол урди ва 16 та голли узатмани амалга оширди. Бу жамоага Испания чемпионлиги ва Чемпионлар лигасида ғалаба қозониш имконини берди.
