Ўзбекистон Республикасининг Мустақиллиги 31 август куни қабул қилинган бўлса-да, халқимиз 1 сентябрь куни бу кунни байрам сифатида нишонлашади. Бугун Мустақиллигимизга 21 йил тўлди.

Ушбу муқаддас байрам билан барчани муборакбод этган ҳолда, ҳар бир юртдошимизга тинчлик-хотиржамлик, оилавий бахт тилаймиз. Сўнгги йилларда турли кўрсаткичлар бўйича ўсишга эришаётган Ўзбекистонимиз янада улкан марраларни қўлга киритишини чин дилдан истаймиз.

Куни кеча мустақил иншоати сифатида "Бунёдкор" спорт комплекси фойдаланишга топширилди. Мазкур стадион барчани қойил қолдиргани бор гап. Футболимиз ҳам ана шундай ажойиб стадион каби халқаро майдонларда қойилмақом натижаларни қўлга киритишига тилакдошмиз.

Боз устига, ушбу йил ўзбек футболи ўзининг 100 йиллигини нишонламоқда. Йил тугашига эса 4 ой вақт қолмоқда. Ана шу қисқа муддат эса терма жамоамиз учун ўта муҳим ҳисобланади. ФУтболчиларимиз сентябрь, октябрь, ноябрь ойларида ўтказадиган ЖЧ саралашининг 3та ўйинида максимал натижани қўлга кирита олса, Бразилия-2014 йўлланмасини деярли ҳал қилиб қўяди.

Муқаддас байрам арафасида ният қилайлик, терма жамоамиз ана шундай юксак вазифани уддаласин, "Бунёдкор" Чемпионлар лигасида ғолиб чиқсин, ўсмирлар ва ёшлар терма жамоаларимиз қитъа чемпионатларида муваффақиятли иштирок этиб, ЖЧга чиқишсин, болалар футболи ривожлансин. Қисқа қилиб айтганда, футболимиз гуллаб яшнасин. Спортчиларимиз мустақил юртимизга кўплаб ғалабали онларн тақдим этаверишсин.

Барчангизга Мустақиллигимизнинг 21 йиллик шодиёнаси муборак бўлсин!