3 сентябрь куни олий лигада 18-тур учрашувларига старт берилади. Унда «Пахтакор» Зарафшонга сафар уюштириб, «Қизилқум» меҳмони бўлади. Бу клубга жорий мавсумда «Пахтакор»нинг собиқ мураббийи Равшан Ҳайдаров устозлиқ қилмоқда. Ҳозирча зарафшонликлар қайд этаётган натижалар ёмон эмас. Чунки мавсум бошланишига деярли бир ойча қолганда йиғилган жамоа ўрта поғоналарда боришнинг уддасидан чиқяпти.

Мазкур баҳсда мезбонлар сафида «Пахтакор»дан ижарага олинган футболчилар майдонга туша олишмайди. Бошқа йўқотишлар юзага келмаган. «Шерлар» сафида ҳам бундай ўйинчилар мавжуд эмас.

Ҳозирга қадар олий лигада ўтказилган 25 учрашувнинг 20тасида «Пахтакор» ғалаба қозонган. 4 баҳсда дуранг қайд этилган бўлса, бир бор «Қизилқум» зафар қучган. Бу 2001 йил Тошкентда рўй берган. Зарафшондаги ўйинларнинг 10тасида «Пахтакор» кучли эканлигини кўрсатган, 2 марта дуранг кузатилган. Охирги бор 2010 йил «Қизилқум» «Пахтакор»дан Тошкентда очко олганди. 72 бор гол урган «Пахтакор» 16 марта ўз дарвозасидан тўп олиб чиққан.

Ёшлар жамоалари учрашуви 2 сентябрь куни соат 17:00да бошланса, асосий таркиблар баҳси 3 сентябрь куни «Прогресс» стадионида соат 16:30да бошланади.

«Қизилқум» – «Пахтакор»
Ҳакамлар: Азиз Асимов (Тошкент), Алексей Миронов (Тошкент), Владлен Лушин (Гулистон), Тимур Галеев (Урганч).
Назоратчи: Артём Арутюнов (Тошкент).