Германиянинг Дюсселдорф шаҳрида шахмат бўйича нуфузли «WR Chess Masters» турнирида ҳамюртимиз Нодирбек Абдусатторов бугун 7-тур доирасида польшалик Ян-Кшиштоф Дудага қарши оқ доналарда ўйнади.
Ҳамюртимиз ўйиннинг дубют қисмида ўз руҳини қурбон бериш эвазига ташаббусни қўлга киритишга муваффақ бўлди. Аммо Дуда яхши ҳимояланди ва Нодирнинг ғалаба қозонишига имкон бермади. Спортчилар ўйин сўнгида асосан пиёдани фарзинга олиб чиқишга ҳаракат қилишди. Аммо бу бахт ҳеч кимга насиб этмади. Оқибатда томонлар дурангга имзо чекишди.
Ушбу дуранг туфайли ўзбекистонлик спортчи ўз очколарини 3.0 баллга етказди. Ватандошимиз жадвалда 7-ўринга кўтарилиб олди. Абдусатторов эртага 8-тур доирасида нидерландиялик Аниш Гирига қарши қора доналарда ўйнайди.
