"Ювентус"нинг собиқ бош мураббийи Андреа Пирло 2020/2021 йилги мавсумда Турин клубида бирга ишлаган ҳужумчи Криштиану Роналду ҳақида фикр билдирди.

Ҳозирда португалиялик футболчи Саудия Арабистонининг "Ан-Наср" клубида ўйнайди, аввалроқ "Манчестер Юнайтед"ни жанжал билан тарк этганди.

"Криштиану билан ишлаш жуда ёқимли эди, бизда ажойиб муносабатлар бор эди ва ҳеч қачон муаммога дуч келмадик. У ҳар доим жуда яхши кайфиятга эга эди. У машғулотлардан сўнг зарбалар устида ишлаш учун қоларди, баъзида мен унга озгина маслаҳат берардим.

Криштиануда улкан иқтидор бор, лекин бунинг ортида ҳам катта меҳнат бор. У ҳар куни биринчи рақамли бўлишни, барча учрашувларда майдонга тушишни истайди. У яхши машқ қилади, яхши овқатланади, яхши ухлайди ... Бу жуда профессионал муносабат. Бунга ота-онаси берган ва уни дунёда биринчи рақамли бўлишга олиб келган истеъдодни ҳам қўшишимиз керак", - деди Пирло Relevo билан суҳбатда.