“Бунёдкор” – “Динамо” учрашувидан кейинги матбуот анжуманида биринчи бўлиб меҳмонлар устози иштирок этди.

- Учрашув қизиқарли ўтди. Имкониятлар ҳар иккала жамоада ҳам бўлди. Мағлуб бўлиш ҳар доим аламли. Айниқса, ғалаба қозониб туриб, ўз хатоинг туфайли ютқазиш жуда ҳам оғир ботади. Тошкентдан дуранг билан қайтишимиз ҳам мумкин эди. Бироқ бу вазифани ҳам уддалай олмадик. Ҳозирги ҳолатимиздан келиб чиқиб айтадиган бўлсам, биз учун ҳар бир очко сув ва ҳаводек муҳим. “Бунёдкор”ни ғалаба билан табриклайман! Нагаевни иккинчи бўлим ўрталарига келиб майдонга туширдим холос. Чунки у умумий гуруҳда сўнгги икки кун шуғулланганди холос. Ундан ташқари, Рўзимбой Аҳмедов ҳозирги кунда яхши спорт формасида. У ўтган ўйинда учта, бугун эса битта голга муаллифлик қилди. Бош мураббий Аҳмад Убайдуллаев ҳамон даволанмоқда. У билан доимий алоқадамиз. Клубда бажараётган ҳар бир ишимиздан уларни хабарлари бор. Турнир жадвалидаги аҳволимизни ўнглаш учун қўлимиздан келган барча чораларни кўришга ҳаракат қиламиз, - деди Сергей Арслонов.