Чоршанба куни ОФК U-20 турнири старт олади. Илгари Осиё U-19 чемпионати номи билан аталган мусобақа беш йилдан сўнг яна қайтди. Осиёнинг ўсиб бораётган иқтидорлари ушбу мусобақада ўз маҳоратларини намойиш этишади.
Қуйида мусобақага оид айрим фактлар билан таништириб ўтамиз.
Индонезия - 2023
Мусобақа сўнггига қадар етиб борган энг яхши 4 та жамоа ФИФАнинг U-20 Жаҳон чемпионатига йўлланма олади. Бу турнир Индонезияда бўлиб ўтади.
Ўйин майдонлари
Ўйинлар икки шаҳардаги тўртта стадионда – «Бунёдкор», «ЖАР», «Локомотив» (барчаси Тошкент) ва «Истиқлол» стадионларида (Фарғона) ўтказилади.
Бузилмас ҳимоя
Эрон Ислом Республикаси, Япония ва Саудия Арабистони саралаш босқичи давомида ўз дарвозалари дахлсизлигини сақлаб қолишди.
Энг кўп гол
Япония саралаш босқичида энг кўп гол урган жамоага айланди. «Кунчиқар юрт» вакиллари 22 марта рақиб дарвозасини ишғол қилган.
Тўхтатиб бўлмас ҳужум
Иордания жамоаси Шимолий Мариана ороллари дарвозасига жавобсиз 16 та гол уриб, саралаш босқичи давомида битта ўйинда урилган энг кўп гол муаллифига айланишди.
Тўпурарлар
Эронлик Амир Иброҳимзода ҳамда кореялик Ли Ён Жун саралаш босқичида ҳар бири 6 тадан гол урган ҳолда Тошкентга етиб келишди. Ўзбекистондаги турнирга япониялик Канта Чиба етиб кела олмади. Биргина унда кўпроқ (9 та гол) гол бор эди.
Гол машинаси
Юқорида тилга олинган Амир Иброҳимзода Бруней устидан 8:0 ҳисобида ғалаба қозонилган ўйинда ўз жамоасининг бешта голига муаллифлик қилди. Бу эса саралаш босқичларидаги бир ўйин учун энг яхши натижа ҳисобланади.
Стабил голеадорлар
Корея Республикасидан Ли Ён Жун, иорданиялик Абу Таха ва индонезиялик Раббани Тасним саралаш босқичида ўз мамлакатлари учун ҳар бир ўйинда гол уриб келишган.
Чемпионлар
Саудия Арабистони амалдаги чемпион бўлса, яна еттита мамлакат ушбу турнирни ютган. Хитой, Ироқ, Эрон Ислом Республикаси, Япония, Корея Республикаси, Сурия ва Қатар тарихида мусобақа кубоги мавжуд.
Корея Республикаси 12 та чемпионлик унвонига эга бўлган ҳолда турнирда энг кўп ғалаба қозонган жамоа ҳисобланади.
