40-бор ўтказилаётган Бутунжаҳон шахмат олимпиадаси якунланишига ҳам 2 тур қолди. Кеча мусобақада 9-тур ўйинлари бўлиб ўтди.

Ўзбекистон қизлар терма жамоаси Қозоғистон билан баҳс олиб борди. Венгрияга қарши дона сурган таркиб бу сафар ҳам ўзгармади. Ҳулкар Тоҳиржонова дам олган бўлса, Нафиса Мўминова, Ирина Геворгян, Нодира Нодиржонова ва Сарвиноз Қурбонбоева шахмат доскаларига қаршисига ўтиришди.

Терма жамоамизнинг 1-рақамли шахматчиси Нафиса Мўминова ўз партиясини барчадан аввал якунлади. 31-юришдан кейин дуранг натижа қайд этилди.

Сарвиноз Қурбонбоева эса муросасиз кечган баҳсда ўзининг марказий пиёдаларидан бирини фарзингача олиб чиқишга муваффақ бўлди ва шундан сўнг унинг рақибаси таслим бўлди.

Икки партиядан кейин қизларимиз 1,5-0,5 ҳисобида олдинга чиқиб олишганди. Бироқ Ирина ва Нодира тенгма-тенг кечган ўйинда ютқазиб қўйишди. Уларнинг мағлубиятига рақиб спортчисининг битта пиёда ортиқлиги сабаб бўлди. Натижада якуний ҳисоб - 1,5-2,5.

Қозоғистон - Ўзбекистон - 2,5-1,5
Гулисхан Нахбаева - Нафиса Мўминова - 0,5-0,5
Гулмира Даулетова - Ирина Геворгян  - 1-0
Динара Садуакассова - Нодира Нодиржонова - 1-0
Мадина Давлетбаева - Сарвиноз Қурбонбоева 0-1

Бу терма жамоамизнинг олимпиададаги иккинчи мағлубияти бўлди. Қизларимиз 9-турдан кейин 11-ўринга тушиб кетишди. Қозоғистон эса 4-ўринга кўтарилиб олди. Жадвални Хитой, Россия ва Украина терма жамоалари бошқаришмоқда.

Терма жамоамизга 10-турда италиялик қизлар рақиблик қилишади. Бу жамоа ҳозирча 12 очко билан 21-ўринни эгаллаб турибди. Италия мусобақада 31-тартиб рақамга эга.