Аввал хабар бериб ўтганимиздек, ОКМК клубининг уй аренаси – «ОКМК спорт мажмуаси» майдони жорий йилда янгиланади.

Маълумки, ЎзПФЛнинг клубларга қўяётган талаблари, қолаверса ОКМК футбол клубининг Осиё Чемпионлар лигаси турнири саралаш боқичидаги иштироки муносабати билан Олмалиқдаги стадион майсалари янгиланиши ҳақида аввал хабар бериб ўтган эдик.

Ўтказилган тендер натижаларига кўра, ғолиб чиққан «КОМРОНБEК МEГА СТРОЙ» қурилиш компанияси бугун, 6 март санасидан стадионда амалий ишларни бошлади.

Учқун Қувонов бочилигидаги мутахассислар бугундан «ОКМК спорт мажмуаси» майсаларини янгилаш билан боғлиқ ишларнинг дастлабки босқичига киришишди. Режага кўра, таъмирлаш ишлари май ойи ўрталарида якунланади. Стадион майсалари футбол учрашувларини қабул қилишга эса июнь-июль ойларидан рухсат берилади.  

Ушбу мутахассислар бунгача «Навбаҳор», «Нефтчи», «Бухоро», «Жар» ва янгиланган «Бунёдкор» стадиони чимларини тайёрлаб, фойдаланишга топширишган эди. Ўйлаймизки, Олмалиқдаги стадион ҳам ОФК ва ФИФА талабларига тўла жавоб бериб, бир қанча халқаро мусобақаларга мезбонлик қиладиган аренага айланади.

ОКМК жамоаси янги чим тайёр ҳолатга келтирилгунга қадар уй учрашувларини Тошкент шаҳридаги «Жар» стадионида ўтказади.