Avval xabar berib o‘tganimizdek, OKMK klubining uy arenasi – «OKMK sport majmuasi» maydoni joriy yilda yangilanadi.

Ma’lumki, O‘zPFLning klublarga qo‘yayotgan talablari, qolaversa OKMK futbol klubining Osiyo Chempionlar ligasi turniri saralash boqichidagi ishtiroki munosabati bilan Olmaliqdagi stadion maysalari yangilanishi haqida avval xabar berib o‘tgan edik.

O‘tkazilgan tender natijalariga ko‘ra, g‘olib chiqqan «KOMRONBEK MEGA STROY» qurilish kompaniyasi bugun, 6 mart sanasidan stadionda amaliy ishlarni boshladi.

Uchqun Quvonov bochiligidagi mutaxassislar bugundan «OKMK sport majmuasi» maysalarini yangilash bilan bog‘liq ishlarning dastlabki bosqichiga kirishishdi. Rejaga ko‘ra, ta’mirlash ishlari may oyi o‘rtalarida yakunlanadi. Stadion maysalari futbol uchrashuvlarini qabul qilishga esa iyun-iyul oylaridan ruxsat beriladi.  

Ushbu mutaxassislar bungacha «Navbahor», «Neftchi», «Buxoro», «Jar» va yangilangan «Bunyodkor» stadioni chimlarini tayyorlab, foydalanishga topshirishgan edi. O‘ylaymizki, Olmaliqdagi stadion ham OFK va FIFA talablariga to‘la javob berib, bir qancha xalqaro musobaqalarga mezbonlik qiladigan arenaga aylanadi.

OKMK jamoasi yangi chim tayyor holatga keltirilgunga qadar uy uchrashuvlarini Toshkent shahridagi «Jar» stadionida o‘tkazadi.