Кеча бўлиб ўтган Ўзбекистон-Кувайт ўртоқлик ўйини Корея спорт нашрларининг диққат марказида бўлди. Жумладан, OSEN нашрининг Тошкентдан хабар берган мухбири ёзишича, “Бош мураббий Чой Канг Хини энг ўйлантирган Одил Аҳмедовнинг жароҳат олгани ростга ўхшайди. Александр Гейнрихнинг “one man show”сига айланган ўйин қайдномасида ҳам Одил Аҳмедов номи кўринмади. Бироқ рақиб Кувайтни U23 терма жамоасидан ҳам бир поғона пастроқ жамоа деб қараса бўлади. Анча бўш жамоа! Шундай бўлса-да Жепаров, Гейнрих, Кападзе каби етакчилар жамоани кучайтира олишди”.
Нашрнинг ёзишича, Чой Канг Хи шу кунга қадар Одил Аҳмедовнинг жароҳат олгани ҳақидаги хабар рост ёки сохта эканлигига иккиланган. Тошкентдаги журналист Одил Аҳмедовни шу куни стадионнинг ВИП ложасида кўрганлигини ёзаркан, “Чой Канг Хи қизиқиши янада ортди”, деб ёзади. Аҳмедовсиз Ўзбекистон терма жамоасига Чой Канг Хи: “Аҳмедовсиз марказий чизиқ анча кучсизланиб қолади!”, дея баҳо берган. Шунингдек, Корея нашрларининг деярли барчаси Ўзбекистоннинг қанотлари анча кучли ўйин кўрсатганлигига эътибор қаратган. Жумладан, Санжар Турсунов ва Вагиз Галиулиннинг жойларини алмаштириб ҳаракат қилганликларию, Акмал Шораҳмедовнинг тезкорликларини юқори баҳолашган. OSEN нашри жароҳати туфайли 5 нафар футболчиларимиз майдонга тушолмасликларини қайд этаркан, “Янги ва ёш ўйинчиларнинг майдонда қандай ўйин кўрсатишлари биз учун жуда қизиқ”, деб ёзади.
Отабек Йўлдошев, Жанубий Корея, Сеул
