Эртадан U20 Осиё кубогининг чорак финал баҳслари старт олади. Бугун терма жамоамиз мураббийи Равшан Ҳайдаров учрашувдан олдинги матбуот анжуманида иштирок этди.
«Бу босқичга етиб келган барча жамоаларни табриклайман. Барча учун муҳим палла бошланди. Бу ёшдаги футболчилар Жаҳон чемпионатига чиқишни жуда ҳам хоҳлашади. Барча шогирдларим ўйин аҳамиятини ҳис қилиб турибди. Эртага боримизни бериб ҳаракат қиламиз.
Барча миқёсдаги жамоаларимизда ҳужумчилар муаммоси ҳар доим мавжуд бўлиб келган. Улар жуда ҳам кўп эмас. Бироқ Пўлатхўжага кўпроқ имкон беришимнинг сабаби - унинг етарлича тажрибасида. Фақат ҳужумчиларга қараб қолмаганмиз. Бошқа позициядагилар ҳам ҳужумга чиқишади.
Мураббийлар штабимизда ёшлар билан ишлаш тажрибаси етарли. Бу авлодга ҳам катта фойдамиз тегади деб ўйлайман. Улар ўсиш жараёнида. Ёшлар учун Жаҳон чемпионати энг муҳим турнир ҳисобланади. Улар шундан сўнг улғаяди. Эртанги рақиб учун махсус режам бор, ўйинчилар борасида ҳам муаммомиз йўқ. Совуққонлик билан ёндашиш жуда ҳам муҳим», деди — Равшан Ҳайдаров.
