"Милан" ҳужумчиси Златан Ибраҳимович жароҳатидан фориғ бўлганида бошидан кечирган қийинчиликлари ҳақида гапирди.
Швециялик футболчи ўтган мавсумнинг иккинчи ярмида тиззасидан жиддий жароҳат олганди. 41 ёшли ҳужумчининг майдонга қайтиши фақат шу йилнинг февраль ойида бўлиб ўтди.
“14 ой ичида учта операцияни ўтказдим, аҳволим умуман яхшиланмай қолган пайт бўлди. Мен йўл охирида ёруғликни кўрмадим, лекин хайриятки, кейин ҳамма нарса ўзгарди.
Мен ҳеч қачон таслим бўлмайман - муаммолар мени фақат кучлироқ қилади. Фаолиятимнинг бошида журналистлар менга ёрдам беришди, улар мен ҳақимда унчалик ёқимли нарсаларни ёзмадилар ва шу тариқа яхшироқ бўлишга ёрдам беришди", - дея Ибраҳимовичнинг сўзларини келтиради Football Italia.
