Бильбаонинг "Атлетик" клуби марказий ҳимоячиси Иниго Мартинес янги мавсумдан бошлаб "Барселона" таркибида ҳаракат қилади.
Томонлар келишувнинг барча шартлари бўйича тўлиқ келишиб олдилар. 31 ёшли футболчи эркин агент сифатида Каталония клубига ўтади, чунки унинг "Атлетик" билан шартномаси июнь ойида тугайди. Таниқли инсайдер Жерар Ромеронинг сўзларига кўра, Мартинес агар рўйхатдан ўтишда муаммолар юзага келса, бошқа клубга ижарага берилиши шарти билан "Барселона" билан шартнома имзолашга рози бўлган. Шу билан бирга, марказий ҳимоячига келишилган маошнинг сақланиши кафолатланади.
Иньиго Мартинес 2018 йилдан буён "Атлетик" сафида тўп сурмоқда ва жамоа сафида 173 та ўйин ўтказиб, 8 та гол уришга муваффақ бўлди.
Аввалроқ каталонияликлар Илкай Гюндоган билан келишувга эришгани, шунингдек, Лионель Месси ҳам "кўк-анорранглилар" таклиф қилган молиявий шартларга рози бўлиши ҳақида хабарлар чиққан эди.