Сўнгги икки ҳафта давомида клубларнинг етакчи футболчилари терма жамоасига ёрдам бериш учун жўнаб кетди. Ниҳоят биз кутган ва мухлислар соғинган клублар футболи қайтди. Бу қайтиш ҳар доимгидек АПЛнинг гранд жамоаларига омадсиз келди.
29-турда Юрген Клопп бошчилигидаги "Ливерпуль" меҳмонда азалий рақибларидан бири ҳисобланмиш "Манчестер Сити" уйида меҳмон бўлди ва йирик 4:1 ҳисобида мағлубиятга учради. Беллашувда Салоҳ ҳисобни очганди, лекин майдон эгалари ушбу голга 4 марта жавоб беришга муваффақ бўлди (Альварес, Де Брюйне, Гюндоган, Грилиш). Тўғри, мазкур баҳсда "қизиллар" фаворит эмасди, аммо кўпчилик Клопп шогирдларини 4:1 ҳисобида мағлуб бўлишини кутмаганди.
Шунингдек, бу турда яна бир сенсация қайд этилди. Лондоннинг "Челси" жамоаси "Астон Вилла"ни қабул қилиб, кутилмаганда 0:2 ҳисобида имкониятни бой берб қўйди. Бу мавсумдаги кўрсаткичлардан олиб қарасак, кутилган натижа, десак ҳам бўлаверади. Дастлаб, Уоткинс ҳисобни очган бўлса, иккинчи таймда Макгин меҳмонларнинг навбатдаги голини урди.
Бугун эса Эрик Тен Хаг бошчилигидаги "Манчестер Юнайтед" "Ньюкасл" меҳмони бўлди ва 2:0 ҳисобида "қарғалар"га имкониятни бой бериб қўйди. Биринчи таймда ҳаммаси яхши кетаётгандек эди. Иккинчи бўлимда эса мезбонларни тўхтатиб бўлмади. Уиллок ҳамда Уилсоннинг голи "янги бойлар"га муҳим ғалабани тақдим этди. Ушбу ғалабадан сўнг Эдди Хау шогирдлари АПЛ турнир жадвалида 3-ўринга чиқиб олди.
FIFA кунларидан зарарсиз чиққан камёб клублар - "Манчестер Сити" ҳамда "Арсенал". Сабаби, мазкур жамоаларнинг асосий таркиб футболчилари ҳамда захирадагиларнинг даражаси деярли тенг. Улар бир-бирларининг ўрнини бемалол тўлдира олади.
Мисол учун, "шаҳарликлар" сафида асосий таркиб ўйинчиси Кайл Уокернинг ўрнини бемалол марказий ҳимоячилардан бири билан тўлдириш мумкин. Шунингдек, ҳужум чизиғида Хулиан Альварес жароҳат олган Эрлинг Холанднинг ўрнини сездирмай, голлар уриши мумкин.
"Арсенал"да эса Букайо Саканинг ўрнини Леандро Троссард ёки яна бир неча номзодлар билан тўлдирса бўлади. Шунингдек, клубнинг яна бир футболчиси Габриел Жезус ҳам жароҳатдан қайтди.
Юқорида санаб ўтилган жамоаларда айнан бир-бирини тўлдириб турувчи футболчилар йўқлиги яққол сезилиб қолди.
Масалан, "Ливерпуль" да Салоҳнинг ўрнини тўлдириб, унинг йўқлигини сездирмайдиган ўйинчи йўқ. Жароҳатдан қайтган Жота эса ҳали ўзининг аввалги формасига қайтмаган. "Манчестер Юнайтед"да Маркус Рэшфорд, Бруну Фернандеш алмаштириб бўлмас ўйинчига айланиб қолган. Шунингдек, янги келган Каземиро ҳам бу мақомга мос тушади. Агар уларнинг ўйини чиқмаса ёки майдонда кўриниш бермаса, натижаси бутун жамоага таъсир қилади.
3-4 та юлдуз футболчи атрофига бутун жамоани қурган клублар мана шундай даврларда қийинчиликларга дуч келади. Катта совринларни олдига мақсад қилиб кўйган катта клублар эса ҳар қандай ҳолатга тайёр туриши лозим. Таркибда тенг кучли ва сифатли футболчиларнинг кўплиги мазкур муаммога ажойиб ечим бўла олади. Нолишлардан эса умуман фойда йўқ.
