«Сити» расман тасдиқлади - Ҳусановда жароҳат йўқ. Шунчаки, унга дам беришган.

«Борнмут»га қарши О’Райлининг муваффақиятли чиқиши «Манчестер Сити»га яна битта қўшимча опцияни, ҳужумкор тактикани тақдим қилди. Аслида яримҳимоячи бўлган О’Райли чап қанотдан жой олади, Гвардиол эса марказий ҳимоячига айланиб, керак бўлганда, ҳужумга чиқилганда, чап қанотни ҳам ёпиши мумкин. Бундай гибрид ролларга Пеп Гвардиола кўп мурожаат қилишини яхши биламиз. Ўйини келиб турганда О’Райлини кўпроқ ўйнатиб, ишланмаларни кўздан кечириб олиш учун айни муддао. Чунки «Лестер» айни пайтда лиганинг энг кучсиз жамоаси - охирги 5 ўйинда бирортаям гол ура олишмаган. Агар бугун «Сити»да муаммо бўлсаям, фақат ҳужумда бўлиши мумкин.

Якшанба куни эса Манчестер дербиси бор. Ўша ўйинда Гвардиола риск қилмайди, ҳимояда ҳимоячилар ўйнашини кутса бўлади. Катта эҳтимол Абдуқодирни айнан ўша ўйинга асраб турган бўлиши мумкин. Зеро, тиғиз феврал-март, терма жамоа ўйинларидан сўнг Ҳусановга ҳам дам олиш зарар қилмайди. Агар қачондир ёш марказий ҳимоячига дам бериш керак бўлса, айнан бугун эмасми энг мақбул пайт? Аксинча, агар Ҳусанов бу сафар ҳам асосийда тушганда, Гвардиола яна Ҳусановга имкон бераётгандек туюларди, дам бериляптими, демак тўлиқ ишонч бор. Синовга мухтож эмас.

Умуман таркибда 20 дан ортиқ футболчилар бўлади ва навбати билан кимдир четда қолиши мутлақо нормал ҳолат. Ана, «Сити» ҳам Ҳусановни четлатди, деб вахима қилишни бас қилинглар. 21 ёшли футболчига шунча пул тўлаб, осонгига воз кечишмайди у ерда. Ҳусанов «Манчестер Сити» таркибидаги футболчи, тамом, доим, қанақа ўйнаркин, неча балл оларкин, хато қилмасмикин, деб хавотир олиб юриш шарт эмас. Пеп акамнинг ўзлари яхши биладилар, эти уники, суяги бизники.

Қаҳрамон Асланов.