«Siti» rasman tasdiqladi - Husanovda jarohat yo‘q. Shunchaki, unga dam berishgan.

«Bornmut»ga qarshi O’Raylining muvaffaqiyatli chiqishi «Manchester Siti»ga yana bitta qo‘shimcha opsiyani, hujumkor taktikani taqdim qildi. Aslida yarimhimoyachi bo‘lgan O’Rayli chap qanotdan joy oladi, Gvardiol esa markaziy himoyachiga aylanib, kerak bo‘lganda, hujumga chiqilganda, chap qanotni ham yopishi mumkin. Bunday gibrid rollarga Pep Gvardiola ko‘p murojaat qilishini yaxshi bilamiz. O‘yini kelib turganda O’Raylini ko‘proq o‘ynatib, ishlanmalarni ko‘zdan kechirib olish uchun ayni muddao. Chunki «Lester» ayni paytda liganing eng kuchsiz jamoasi - oxirgi 5 o‘yinda birortayam gol ura olishmagan. Agar bugun «Siti»da muammo bo‘lsayam, faqat hujumda bo‘lishi mumkin.

Yakshanba kuni esa Manchester derbisi bor. O‘sha o‘yinda Gvardiola risk qilmaydi, himoyada himoyachilar o‘ynashini kutsa bo‘ladi. Katta ehtimol Abduqodirni aynan o‘sha o‘yinga asrab turgan bo‘lishi mumkin. Zero, tig‘iz fevral-mart, terma jamoa o‘yinlaridan so‘ng Husanovga ham dam olish zarar qilmaydi. Agar qachondir yosh markaziy himoyachiga dam berish kerak bo‘lsa, aynan bugun emasmi eng maqbul payt? Aksincha, agar Husanov bu safar ham asosiyda tushganda, Gvardiola yana Husanovga imkon berayotgandek tuyulardi, dam berilyaptimi, demak to‘liq ishonch bor. Sinovga muxtoj emas.

Umuman tarkibda 20 dan ortiq futbolchilar bo‘ladi va navbati bilan kimdir chetda qolishi mutlaqo normal holat. Ana, «Siti» ham Husanovni chetlatdi, deb vaxima qilishni bas qilinglar. 21 yoshli futbolchiga shuncha pul to‘lab, osongiga voz kechishmaydi u yerda. Husanov «Manchester Siti» tarkibidagi futbolchi, tamom, doim, qanaqa o‘ynarkin, necha ball olarkin, xato qilmasmikin, deb xavotir olib yurish shart emas. Pep akamning o‘zlari yaxshi biladilar, eti uniki, suyagi bizniki.

Qahramon Aslanov.