Вилоят биринчиликлари орасида Қашқадарё лигаси ҳам секин-аста ўз якунига етиб бормоқда. Мусобақанинг иккинчи босқичида 10та жамоа бештадан икки гуруҳга бўлинганди. Регламентга мувофиқ ҳар бир гуруҳда биринчи-иккинчи ўринни эгаллаган жамоалар ярим финалда иштирок этиш ҳуқуқини қўлга киритишди.

«А» гуруҳида дастлабки икки ўринни «Насаф-96» билан «Нуристон» , «В» гуруҳида эса «Машъал-96» ва «Олимпия» жамоалари эгаллашди. Айни пайтда «Машъал-96» жамоасига Вали Келдиев ҳамда Икрем Репатов мураббийлик қилишмоқда.

Шу пайтгача ярим финалнинг битта жуфтлиги ўтказиб бўлинди ва бунда «Насаф-96» «Олимпия» билан 1:0, 2:2 ҳисобларини қайд этиб, финалга йўлланма олди. Ярим финалнинг иккинчи жуфтлигида эса «Машъал-96» «Нуристон»га қарши уй-меҳмон тарзида иккита беллашув ўтказади. Агар муборакликлар «Нуристон» тўсиғидан ўтишса, унда чемпионатнинг ҳал қилувчи ўйинида «Насаф-96» билан баҳс олиб боришади.