"Челси" Маурисио Почеттинони бош мураббий этиб тайинлашга яқин турибди.

Sky Sports нашри хабарига кўра, Лондон клуби ва 51 ёшли мутахассис ўртасидаги музокаралар муваффақиятли якунланишга яқин турибди. "Челси" келаси ҳафта Почеттино билан келишувни эълон қилиши мумкин.

Сўнгги бир неча кун ичида мулоқот жуда ижобий бўлди, аммо томонлар ҳали шартнома имзолашмаган.

Музокаралар давомида томонлар “Челси” таркибини шакллантириш тамойиллари, шунингдек, жамоанинг жорий қайднома ҳажмини муҳокама қилишди. Почеттино билан бирга клубга келадиган мураббийлар штаби ҳам муҳокама қилинди.

Франк Лэмпард мавсум охиригача "кўклар"ни бошқариши кутилмоқда.

Почеттино 2022 йилнинг июлидан бери - "ПСЖ"дан ҳайдалганидан бери ишсиз эди. Аввалроқ у "Тоттенхэм"ни бошқарган.