“Фрозиноне” Италия иккинчи лигасининг 35-тури доирасидаги “Режина”ни (3:1) мағлуб этди. Ғалаба жамоанинг мавсум якунида А Серияга чиқишини кафолатлади.
2006 йилги жаҳон чемпиони Фабио Гроссо бош мураббийлигидаги “Фрозиноне” 71 очко билан турнир жадвалида пешқадамлик қилмоқда. Чемпионат тугашига уч тур қолганда учинчи поғона билан фарқ 13 очкони ташкил этади.
Клуб матбуот хизмати такидлаганидек, “Фрозиноне” тарихида учинчи марта А Серияда иштирок этади. Илгари бу 2015/16 ва 2018/19 мавсумда содир бўлган. Ҳар икки марта жамоа турнир жадвалида 19-ўринни эгаллаган.
