"ПСЖ" раҳбарияти ўз жамоаси ҳужумчиси Лионель Мессини Саудия Арабистонига сафари учун жазолаши мумкин, деб хабар бермоқда L'Equipe.
Ҳужумчи клуб жойлашган жойини бош мураббий Кристоф Галтье ва футбол маслаҳатчиси Луиш Кампушнинг рухсатисиз тарк этган.
Нашрнинг ёзишича, Мессининг душанба куни эрталаб машғулотларга келмагани жамоа ичида кўп гап-сўзларга сабаб бўлган. Кўпчилик раҳбариятнинг аргентиналикка нисбатан ижобий муносабатидан норози эди.
Вазият билан клуб президенти Носир Ал-Хелайфининг шахсан ўзи шуғулланади ва клуб раҳбарияти футболчига нисбатан мумкин бўлган жазо чоралари ҳақида қарор қабул қилиши мумкин.
Мессининг "ПСЖ" билан шартномаси шу ёзда якунига етади.
