"Лидс" ўзининг расмий сайтида Сэм Эллардайс жамоанинг янги бош мураббийи этиб тайинланганини эълон қилди.
Бу лавозимда у “товуслар” қўл остида 12 та учрашув ўтказган Хави Грасиянинг ўрнини эгаллади. Эътиборли томони, Эллардайс жорий мавсумда "Лидс"нинг тўртинчи мураббийига айланди. Аввалроқ 68 ёшли мутахассис “Сандерленд”, “Кристал Пэлас” ва “Эвертон”ни қуйи лигага тушиб кетишдан қутқариб қолганди.
"Лидс" 34 турдан кейин 30 очко билан Премьер-лигада 17-ўринда бормоқда. Қолган ўйинларда Эллардайс жамоаси "Манчестер Сити", "Ньюкасл", "Тоттенхэм" ва "Вест Хэм" билан ўйнайди.
