Аргентина майдонларида бўлиб ўтадиган ёшлар ўртасидаги Жаҳон чемпионатининг старт олишига саноқли кунлар қолди. Осиё чемпиони сифатида мундиалга йўлга олган Ўзбекистон U-20 терма жамоаси гуруҳ босқичида Аргентина, Гватемала ва Янги Зеландия вакилларига қарши баҳс олиб боради.
ЎФА раҳбарияти мусобақа олдидан Ўзбекистон U-20 терма жамоаси аъзолари билан учрашди. Жаҳон чемпионатида Ватан шарафини ҳимоя қилиш ҳар бир футболчи учун фахр эканлиги, жамоа бирдам бўлиб, футболимиз даражасини халқаро майдонда муносиб намоён этиш кераклиги таъкидланди. Фахрийларимиз ҳар бир футболчи профессионализм, интилиш ва меҳнатсеварликни ўзида мужассам қилган ҳолда майдонга тушишлари кераклигини айтдилар.
Ўз ўрнида жамоамизнинг бир қатор етакчи футболчилари ҳам ўз фикрларини билдириб ўтишди. Шундан кейин раҳбарият мураббийлар штаби билан жамоанинг айни пайтдаги ҳолати ва тайёргарлик жараёни ҳақида суҳбатлашди. Тиббий штабга мусобақа давомида футболчиларнинг соғлиғи, тикланиши ва витаминизациялаш жараёнига жиддий эътибор бериш, юқори даражада тиббий ёрдам кўрсатиш амалиётини давом эттиришга кўрсатма берди.
Учрашув якунида ЎФА раҳбарияти масъулиятли турнир олдидан жамоамизга яна бир бор омад тилади.
