Ўзбекистон ўсмирлар терма жамоаси Эронга қарши кўк рангли либосларда ҳаракат қилади.

Дилшод Нуралиев қўл остидаги Ўзбекистон ўсмирлар терма жамоаси яна саноқли дақиқалардан кейин Эронда давом этаётган Осиё чемпионати ярим финал ўйинлари доирасида мусобақа мезбонларига қарши майдонга чиқади. Теҳрондаги «Пас» стадионида ўтказиладиган ўйин Тошкент вақти билан 18:30да бошланади. Иккинчи ярим финал ўйинида Япония Ироққа қарши баҳс олиб боради.

Эронга қарши ўйинга ўзбекистонлик ўсмирларни ярим ҳимоячи Отабек Шукуров сардор сифатида бошлаб тушади. Сурияга қарши ўйиндан кейин сардорлик боғичини олган ҳужумчи Муҳиддин Одилов эса бу сафар захирада қолдирилди. Жанубий Кореяга қарши ўйин қаҳрамонларидан бири – ҳужумчи Акобир Тўраев эса чорак финал ўйинида бўлганидек, ўйинни асосий таркибда бошлайди.

Эронга қарши ўйинда Ўзбекистон ўсмирлар терма жамоасига дарвозабон Шоҳруҳжон Эшбўтаев ҳамда ҳимоячи Ҳумоюн Аъзамов ёрдам бера олмайди. Терма жамоа шифокорлари берган маълумотга кўра, Эшбўтаев 2 октябрь куни «Озоди-3» майдонида ўтказилган машғулотлар чоғида жароҳат олган бўлса, Аъзамов шамоллаб қолган. Маълумот ўрнида, Эшбўтаев гуруҳ босқичида Ҳиндистон ва Хитой терма жамоаларига қарши ўйинларда сардорлик боғичи билан майдонга тушган бўлса, Аъзамов барча ўйинларнинг қайдномасига киритилганди.