Суперлига 10-турида сафарда «Пахтакор»га мағлуб бўлган «Бухоро» клуби бош мураббийи Улуғбек Бақоев психологик ҳолат, футболчиларнинг даражаси, ёш футболчилар ва Дилшод Жўраевнинг майдондаги позицияси ҳақида гапирди.

«Ўйинни ёмон бошладик ва бу нима билан боғлиқлигини билмайман. Бугун чемпионга қарши баҳс олиб бордик ва улар ҳар жабҳада биздан кучлилигини кўрсатишди. Айниқса, биринчи таймда улар тўпга эгалик қилишда, техник аспектларда ва эпизодларда биздан устун эдилар. Иккинчи таймда ўйинимизни ўзгартира олдик, вазиятлар яратдик, аммо, улардан унумли фойдалана олмадик. Охирги дақиқаларда, ҳатто пенальтидан ҳам гол ура олмадик. Менимча, дуранг адолатли натижа бўлар эди», - деди Бақоев.

«Таркибда турли хил савия ва даражадаги футболчилар бор. Уларнинг майдондаги ҳатти-ҳаракатлари айнан даражага боғлиқ. Агрессия этишмаётганининг сабаби ҳам менимча айнан шундандир».

«Бугун ютқазаётганимиз учун майдонда тактик ўзгаришлар қилишимиз керак эди. Ярим ҳимоя чизиғимиз яхши ўйнай олмади. Алмаштиришлар сабаби, айнан шу. Рақиб бир киши кам бўлиб қолгани сабабли, майдонда ўзгартиришлар қилишимиз лозим эди. Станиславлиевични эртароқ алмаштирилиши шу сабаблидир».

«Барчасини қисқа вақтда ўзгартира оладиган сеҳргар эмасмиз. Бунинг учун вақт керак. Бизда ёш иқтидорли футболчилар этарли ва улар билан кўпроқ ишлашимиз керак. Кўпроқ меҳнат қилсак, натижага қила оламиз».

«Рақиб майдонда бир киши камчилик бўлиб қолгач, кўпроқ ҳужумга чиқишимиз керак эди ва айнан шунинг учун Дилшод Жўраевни бироз олдинроққа чиқиб ўйнашини лозим топдик. Бу тактик ўзгариш эди. Кейинги ўйинларда ҳам уни олдинги чизиққа яқин жойда ўйнатармиз».