"Бавария" ва "ПСЖ" "Арсенал" ярим ҳимоячиси Мартин Эдегор учун курашади. Бу ҳақда El Nacional хабар бермоқда.
Манба берган хабарга кўра, 24 ёшли норвегиялик футболчини ўз сафига ҳар икки клуб ҳам қўшиб олмоқчи. Қайд этилишича, трансфер ёзда амалга ошиши мумкин.
Эдегорнинг "Арсенал" билан амалдаги шартномаси 2025 йилнинг ёзига қадар мўлжалланган. Transfermarkt портали Норвегия терма жамоаси футболчисини 80 миллион еврога баҳоламоқда.
Эдегор жорий мавсумда Премьер-лигада 35 та ўйинда майдонга тушиб, 15 та гол урди ва 8 та голли узатмани амалга оширди. Футболчи 2021 йилдан бери "канонирлар" шарафини ҳимоя қилиб келмоқда. У аввалроқ "Реал Сосьедад", Нидерландиянинг "Витесс" ва Мадриднинг "Реал" клубларида тўп сурган.