17 май, чоршанба куни Чемпионшип плей-оффининг ярим финал жавоб ўйинида “Ковентри” сафарда “Мидлсбро”ни минимал 1:0 ҳисобида мағлуб этди. Шу тариқа жамоа мусобақа финалига чиқди.
“Ковентри” ярим ҳимоячиси Густаво Хамер ўз ҳисобига 57-дақиқада гол ёздириб қўйди.
Жамоалар ўртасидаги биринчи учрашув голсиз дуранг билан якунланганди. Шу тариқа, икки ўйин йиғиндисига кўра “Ковентри” финалга чиқди. Англия Премьер-лигасида иштирок этиш ҳуқуқи учун ҳал қилувчи баҳсда жамоа “Лутон” билан куч синашади. Ўйин 27 май шанба куни "Уэмбли" стадионида бўлиб ўтади. Учрашув Тошкент вақти билан 20:45 да бошланади.
"Мидлсбро"ни "Манчестер Юнайтед" ва Англия терма жамоасининг собиқ ярим ҳимоячиси Майкл Кэррик бошқаради.
Аввалроқ “Бёрнли” ва “Шеффилд Юнайтед” тўғридан-тўғри Премьер-лигага йўл олишганди.
