Осиё чемпионатида Ўзбекистон ўсмирлар терма жамоасида 3 нафар сардор билан ҳаракат қилди. Дастлаб 12-рақамли Шоҳрухжон Эшбўтаев сардорлик боғичи билан ҳаракат қилган бўлса, дарвозабон Хитойга қарши ўйинда қўпол хатога йўл қўйганидан кейин навбатдаги ўйинларда майдонга тушмади. Боз устига, ярим финал ўйини олдидан ўтказилган машғулот чоғида у жароҳат олди. Сурия билан ўйинда сардорлик боғичи 23-рақамли Муҳиддин Одиловга топширилди. Аммо ўша ўйиннинг сўнгги дақиқаларида Одилов ўзидаги сардорлик боғичини ҳакам ёрдамида Отабек Шукуровга топширди. Қизиқ томони, ўша пайтда Муҳиддин ҳали майдонни тарк этмаганди. Ўшандан бошлаб қолган барча ўйинларда сардорлик вазифаси Отабек Шукуров зиммасига юкланди. Финал ўйинидан кейин чемпионлик кубогини айнан Отабек қабул қилиб олди ва биринчи бўлиб уни боши узра баланд кўтарди.

Тошкент халқаро аэропортида Отабек Шукуровни ҳам суҳбатга тортдик. Чироқчилик йигит шошаётган бўлса-да, бир нечта саволларимизга жавоб қайтарди.

— Отабек, чемпион жамоага топшириладиган Кубокни қабул қилиб олаётганингизда кўнглингизда нималарни ҳис қилдингиз?
— Буни сизга сўз билан таърифлаб бера олмайман. Шундай ҳаяжонландимки, биз томон олиб келинаётган кубокни кўриб, вужудимда ғалати бир ҳиссиёт уйғонди. Кубокни барчадан аввал кўтариш бахти ҳар кимга насиб қилавермайди. Буни менга насиб этгани учун Яратганга минг марта шукроналар айтаман.

— Шоҳруҳ Эшбўтаев майдонга тушмагандан кейин сардорлик вазифаси Муҳиддин Одиловга топширилганди. Аммо кейинчалик боғични сиз қабул қилиб олдингиз. Бунинг сабаби нимада?
— Бу бош мураббийнинг қарори. Шунинг учун бу тўғрисида ҳеч нарса дея олмайман.

— Жамоа сардори сифатида майдонда ҳаракат қилиш ва оддий ўйинчи бўлиб ўйнашнинг фарқи нимада?
—Сардор жамоанинг ғалабаси учун ҳаммадан кўра кўпроқ ҳисса қўшиши лозим. Ҳам ўзингиз яхши ўйин кўрсатишингиз керак, ҳам жамоа аъзоларига ўйин пайтида керакли кўрсатмаларни бериб боришингиз лозим.

— Мусобақада битта гол урдингиз ва у гол чиройли чиқди.
— Майдон марказида тўпни қабул қилиб олганимдан кейин қаршимда рақиб футболчилар йўқлигини кўрдим ва олдинга интилдим. Жарима майдончасига яқинлашиб қолганимдан кейин ҳужумдаги шерикларимни қидирдим. Қулай вазиятда турган шеригим йўқлиги боис, олдимдаги эронлик ҳимоячини алдаб ўтдим ва дарвозабоннинг олдинга чиқиб келаётганини кўриб, чап оёқда бўлса ҳам зарба беришга қарор қилдим. Шукрки, зарбам аниқ ва муваффақиятли чиқди.