"Манчестер Сити"нинг собиқ ярим ҳимоячиси Яя Туре "шаҳарликлар" раҳбариятидан ҳужумчи Садио Мане билан шартнома имзолашни сўраганини тан олди.
“Мен доим Мане билан ўйнашни хоҳлаганман. Мен "Сити"да ва у "Саутгемптон"да бўлганимда, мен уни жуда ҳурмат қилардим ва раҳбариятдан у билан шартнома имзолашни сўрадим. Аммо охир-оқибат бу содир бўлмади. Клопп уни ўз сафига қўшиб олди, энди қаранг, у "Ливерпуль" учун нима қилди, у ажойиб эди. Мен уни футболчи сифатида яхши кўраман", - деди Туре.
Мане 2014 йилдан 2016 йилгача "Саутгемптон"да ўйнаган. Умуман олганда, у "авлиёлар" сафида Премьер-лигада 67 та ўйин ўтказиб, 21 та гол урган.
