ПФЛ тартиб-интизом қўмитасининг навбатдаги йиғилиши бўлиб ўтди. Унга кўра Олий Лига, Ёшлар Биринчилиги ҳамда Биринчилик баҳсларида майдондан четлатилган футболчиларга қўшимча чоралар кўрилди.

ОЛИЙ ЛИГА
23-турдан ўрин олган «Металлург» жамоасига қарши кечган баҳсда тўпсиз қолган рақибининг юзига зарба бергани учун майдондан четлатилган «Шўртан» ҳимоячиси Асрор Алиқулов, тартиб интизом қўмитаси қарорига кўра мавсум охиригача Олий Лига баҳсларидан четлатилди.

ЁШЛАР БИРИНЧИЛИГИ
20-турдан ўрин олган «Навбаҳор» клубига қарши учрашувда рақиб футболчисига нисбатан ҳаддан ташқари қўполик ишлатган ва майдондан четлатилган «Олмалиқ» ярим ҳимоячиси Зафар Тўраев, 3та ўйинга дисквалификация қилинди.

«Бухоро» клубига қарши кечган 20-тур учрашувида агрессив ҳатти-ҳаракати учун майдондан четлатилган «Бунёдкор» ярим ҳимоячиси Дилшод Жўраев 3 ўйинга дисквалификация қилинди.

«Насаф» клубига қарши кечган 21-тур беллашувида учрашув бош ҳаками шаънига номаъқул сўзларни ишлатгани учун майдондан четлатилган «Машъал» ҳимоячиси Искандар Шойқулов 3та учрашувга дисквалификация қилинди ва жаримага тортилди.

«Динамо»га қарши 22-тур баҳсида рақибга атайин жароҳат етказишга урингани учун майдондан четлатилган «Машъал» ҳимоячиси Алик Ҳайдаров 3та ўйинга дисквалификация қилинди.

«Насаф» жамоасига қарши кечган 23-тур учрашувида рақиб ўйинчиси шаънига ноъмақул сўзларни ишлатгани учун майдондан четлатилган «Пахтакор» ярим ҳимоячиси Аббосбек Махсталиев, 2та ўйинга дисквалификация қилинди ҳамда жаримага тортилди.

БИРИНЧИ ЛИГА
«Сўғдиёна» жамоасига қарши кечган иккинчи босқичнинг 9-тур учрашувида учрашув бош ҳаками шаънига номаъқул сўзларни ишлатгани учун майдондан четлатилган «Қўқон-1912» Ғиёсжон Сайдуллаев, 4та учрашувга четлатилди ҳамда жаримага тортилди.

«Чуст-Пахтакор» жамоасига қарши кечган иккинчи босқичниннг 9-тур учрашувида ўз жамоадоши шаънига номаъқул сўзларни ишлатгани учун майдондан четлатилган «Хоразм» ҳужумчиси Умар Рахимов, 3та ўйинга четлатилган.

«Насаф-2» жамоасига қарши кечган 11-тур учрашувида рақиб футболчисининг юзига зарба бергани учун майдондан четлатилган «Чуст-Пахтакор» дарвозабони Музаффар Абдуллаев, 3та ўйинга дисквалификация қилинди.

«Зарафшон-ПФК» жамоасига қарши кечган 14-тур баҳсида учрашув бош ҳакамига қасддан жароҳат етказиш мақсадида зарба бергани учун майдондан четлатилган «Нефтчи» ҳужумчиси Озод Каримов, 10та учрашувга четлатилди.

«Янгиер» жамоасига қарши кечган 14-тур учрашувида рақиб ўйинчисининг юзига зарба бергани учун «Хоразм» ярим ҳимоячиси Ботир Латипов, 2012-йилги мавсум охиригача дисквалификация қилинди ҳамда жаримага тортилди.

«Янгиер» жамоасига қарши кечган 14-тур учрашуви якунига етганидан сўнг «Янгиер» клуби вице- президенти Эркин Давлатовнинг юзига зарба бергани учун майдондан четлатилган «Хоразм» ҳимоячиси Жасур Отажонов, мавсум охиригача дисквалификация қилинди ҳамда жаримага тортилди.