Ўзбекистон U-19 ёшлар терма жамоаси 31 октябрь куни Лондоннинг «Арсенал» клуби Дубай Академиясига қарши ўртоқлик учрашувида майдонга тушади. Ўйин Академиянинг майдонида ўтказилади ва Тошкент вақти билан 19:30да бошланади.
Бир неча кундан сўнг старт оладиган Осиё чемпионатига тайёргарлик кўраётган Ўзбекистон ёшлар терма жамоаси Дубайга келганининг иккинчи куни икки маҳал машғулот ўтказди. Улардан дастлабкиси терма жамоа делегацияси истиқомат қилаётган «Etisalat» Академияси базасида ўтказилган бўлса, кечки машғулотлар Лондоннинг «Арсенал» клуби Дубай Академияси қароргоҳида ўтказилди. Иккинчи машғулот икки соат давом этди ва унда мураббийлар футболчиларнинг техник-тактик ҳаракатларига катта эътибор қаратишди.
Бугун, 31 октябрь куни Аҳмаджон Мусаев қўл остидаги терма жамоа расмий мусобақа олдидан сўнг назорат ўйинини ўтказади. Шундан сўнг терма жамоа делегацияси 1 ноябрь куни Дубайдан, Фужайра билан биргаликда ёшлар ўртасидаги 2012 йилги Осиё чемпионатини қабул қиладиган Рас ал-Хайма шаҳрига йўл олади.
Қайд этиш жоиз, Ўзбекистон терма жамоаси Осиё чемпионати доирасидаги илк ўйинини 4 ноябрь куни ўтказади. Аҳмаджон Мусаев шогирдларининг илк рақиби Вьетнам терма жамоаси бўлади. Ўйин Тошкент вақти билан 22:00да бошланади.
