"Наполи"нинг ҳужумкор ярим ҳимоячиси Хвича Кварацхелия фаолиятини Англия премьер-лигасида давом эттириш имкониятига эга, деб хабар беради Calciomercato.
Италиялик журналистларга маълум бўлишича, грузиялик ярим ҳимоячининг трансферига "Ньюкасл" қизиқмоқда.
Кварацхелиянинг хариди учун "зағизғонлар" раҳбарияти неаполликларга тахминан 90 миллион евро ва бонус тўловларини таклиф қилишга тайёр.
Хвича ўтган ёзда “Наполи”га 5 йиллик шартнома асосида келиб қўшилган эди. Жамоа билан биргаликда у А Серия чемпионига айланди.
Италия чемпионатининг сўнгги мавсумида ярим ҳимоячи 34 та ўйинда майдонга тушиб, 12 та гол урди ва ўнта голли узатмани амалга оширди.
