Эронлик ҳужумчи Меҳди Таремининг агенти ўз мижози «МЮ» сафини тўлдириши мумкинлигига шама қилди.
Ваҳоланки, ҳаммасидан хабардор матбуотда бу футболчи ва «қизил иблислар»га боғлиқ ҳеч қандай умумий маълумот чиқмаганди. Қизиқарли бурилиш.
Маълумот учун, «МЮ» ҳозирга қадар Мэйсон Маунт билан шартнома тузишга улгурди ва энди «Интер» дарвозабони Андре Онана трансфери устида фаол иш олиб бормоқда. Иккинчи томондан, бош мураббий Эрик тен Хаг баҳордаёқ аввало, сифатли ҳужумчига эҳтиёжи борлигини маълум қилганди. Манкунианликлар шунга яраша Гарри Кейн трансфери масаласида музокара бошлашга уринишди, аммо... Энди эса ОАВ хабарларига қараганда, улар «Тоттенхэм» голеадори номзодидан воз кечиб, эътиборни даниялик ҳужумчи Расмус Хейлундга буришган. «Аталанта» ҳужумчисининг ўзи «Олд Траффорд»га кўчиб ўтишга мойил, фақат шуниси борки, бергамоликлар унинг учун каттагина сумма сўрашмоқда. Қолаверса, Расмусда топ-лигада ўйнаш тажрибаси ҳали кам.
Агент Борн Хорамделнинг ишорасига ишонсак, «қизил иблислар» ҳужумига яна бир яққол номзод бор. «Порту»да етакчилар гуруҳига қўшилган Меҳди Тареми манфаатларини ҳимоя қилувчи воситачи ижтимоий тармоқлардаги шахсий саҳифасига «Олд Траффорд»га киравериш нуқтасига осиб қўйилган «Юнайтед» рамзи суратини жойлаштирди. Такрорлаш керак, бунга қадар 30 ёшли эронликнинг «Юнайтед»га ўтиши юзасидан қисқа хабар ҳам чиқмаганди. Лекин агент ишораси мантиққа зид эмас. Биринчидан, Эрон миллий жамоаси вакили ўтган мавсум «Порту»да 29та гол урди. Иккинчидан, Португалиянинг O Jogo нашри маълумотларига қараганда, унинг трансферини 17 миллион фунтга сотиб олиш имкони бор. Айтганча, олдинроқ Таремига «Арсенал» томонидан қизиқиш борлиги айтилганди. Афтидан, бу борада Микель Артета олдида жиддий рақиб ҳам йўқ эмас. Ҳар ҳолда, Manchester Evening News нашрининг қўшимча ахбороти бўйича айтсак, клуб рамзи сурати олдинроқ олинган, аммо бу Тареми бўйича гап-сўзлар умуман йўқлигини англатмайди. Қизиқ, «қизил иблислар» мухлислари эронлик ҳужумчи вариантига қандай қарашаркин...?
