Бугун ёшлар ўртасидаги Осиё чемпионати чорак финал баҳслари олдидан бош мураббийлар иштирокида матбуот анжумани ўтказилди. Ўзбекистон ва Сурия терма жамоалари бош мураббийлари иштирокидаги матбуот анжумани Рас ал-Хайма шаҳридаги "Cove Rotana" меҳмонхонасида бўлиб ўтди.

Аҳмаджон Мусаев (Ўзбекистон ёшлар терма жамоаси бош мураббийи):
— Чорак финалга чиққан барча жамоани табриклайман. Уларнинг ҳар бири жаҳон чемпионатига чиқиш учун муносиб. Сурия терма жамоасини эса яхши ўйин билан табриклайман. Эртага жамоалар мухлисларга ёқадиган ўйин намойиш қилишади, деган умиддаман.

— Жамоангизда иқтидорли ёшлар кўп деб ўйлайсизми?
— Албатта. Ўзбекистоннинг ушбу жамоасида жудаям кўп иқтидорли ва ёрқин футболчилар кўп. Улар яқин йиллар ичида миллий терма жамоанинг асосини ташкил қилишади. Мен уларнинг имкониятларига ишонаман.

— Рақиб ҳақида нима дея оласиз?
— Сурия терма жамоаси гуруҳ ўйинлари орқали кучли жамоа эканини исботлади. Бу жамоа билан ўйин осон кечмайди. Шунга қарамай, биз ўз кучимизга ишонамиз ва бўлажак баҳсга тайёрмиз.