Бугун "Олмалиқ" жамоаси навбатдаги назорат баҳсини Зарафшоннинг “Қизилқум” жамоаси билан ўтказди. Қизиқарли ўтган баҳсда ишқибозлар 3та гол кўришди.

Ўйиннинг дастлабки дақиқаларидан шиддатли ҳужумлар ташкил этган меҳмонлар устунликни голга айлантира олишмади. 10-дақиқада Тимур Васильевнинг жарима майдонига кириб йўллаган кучли зарбасидан сўнг тўп дарвоза тўсинига теккан ҳолда яна майдонга қайтди. Орадан кўп ўтмай яна Васильевда қулай вазият вужудга келтирилди. Бу гал у тўпни ўзида узоқ ушлаб қолганлиги сабаб ҳимоячиларимиз ундан тўпни олиб қўйишга эришишди. Шундан сўнг, мезбонлар ташаббусни ўз тарафларига оғдира бошладилар. 23-дақиқада чап қанотдан Исроил Эргашевнинг тўп оширишидан сўнг Зафар Тўраев яқин масофадан кучли зарба билан ҳисобни очди. Бу голдан сўнг майдонда кескин кураш бошланиб кетди. Аммо дарвозаларга бошқа гол урилмади. Иккинчи таймни ҳар иккала жамоа бир қатор ўзгаришлар билан амалга оширди. 61-дақиқада Санжар Шоаҳмедов бир пас билан Маъруф Муродовни қулай вазиятга чиқарди. Маъруф бундан унумли фойдаланиб тўпни жарима майдони сари узатди. Тўпга чиқишга Тимур Кагиров хато қилди. Ундан ўтган тўп рекошет тарзида Алишер Саматов билан бирга дарвоза тўридан жой олди. Орадан икки дақиқа ўтиб Тўлқин Мирзаев жамоадоши Ғулом Ўруновни дарзабон билан бирга бир вазиятга чиқарди. Ғулом бу имкониятни гол билан нишонлади. Ўйиннинг сўнгги дақиқаларида бир неча қулай вазиятлардан футболчилар унумли фойдала олишмади.

"Олмалиқ" навбатдаги учрашувни 25-тур доирасида 17 ноябрь куни Тошкентнинг “Пахтакор” жамоаси билан ўтказади. Ўйин Ўзбекистон профессионла футбол лигаси талабига кўра 14:00да бошланади.

Ўртоқлик учрашуви: “Олмалиқ” – “Қизилқум” 2:1 (1:0)
Голлар: Зафар Тўраев 23, Маъруф Муродов 61 – Ғулом Ўрунов 63
Огоҳлантиришлар: Зафар Тўраев 42, Александр Лупашко 83
“Олмалиқ”: Роман Абдулов (Павел Харчик, 46), Азамат Исроилов, Евгений Гоголь (Арсен Тюленев, 46), Дарко Станоевич (Тимур Яфаров, 46), Баҳром Юлдашев, Исроил Эргашев (Сухроб Бердиев, 46), Достон Абдураҳмонов (Александр Востриков, 67), Тимур Айзаттулов (Санжар Шоаҳмедов, 46), Зафар Тўраев (Александр Лупашко, 46), Зоҳир Пиримов (Маъруф Муродов, 57), Носир Отақўзиев (Зафар Полвонов, 46).
“Қизилқум”: Элдор Тожибоев, Акмал Рустамов, Илья Ильин (Акмал Холиқов, 77), Тимур Кагиров, Алишер Саматов (Файзулла Қамбаров, 83), Аваз Агалиев (Тўлқин Мирзаев, 46), Азамат Бобожонов, Ғулом Ўрунов (Алишер Холиқов, 83), Музаффар Умурзоқов (Фаррух Ҳайдаров, 55), Тимур Васильев (Сарвар Холматов, 60), Санъат Шихов (Феруз Бобоқулов, 68).
Олмалиқ. “Металлург” стадиони. 10 ноябрь