Мюнхеннинг 34 ёшли швейцариялик дарвозабони Янн Зоммер 6 миллион евро эвазига "Интер"га ўтади, деб ёзмоқда журналист Фабрицио Романо.
Манбанинг хабарига кўра, итальян клуби бу суммани икки транзакцияда тўлайди. Дарвозабон бугун Миланга учиб келади. Зоммернинг тиббий кўрикдан ўтиши эртага, 7 август куни бўлиб ўтади.
Аввалроқ швейцариялик дарвозабон Италия клуби билан 2025 йилнинг ёзига қадар шартнома имзолаши ҳақида хабар берилганди.
34 ёшли посбон 2023 йилнинг январида Менхенгладбахнинг "Боруссия" клубидан 9 миллион евро эвазига "Бавария»"га ўтганди. Мюнхен таркибида Янн 25 ўйин ўтказди ва Германия чемпионига айланди.
Янн Зоммер Швейцария терма жамоасида 84 та ўйин ўтказган. Футболчи икки марта жаҳон чемпионатларида (2018 ва 2022) ва икки марта Европа чемпионатларида (2016 ва 2020) ўз мамлакати шарафини ҳимоя қилган.
