Шифокорлар “Архентинос Хуниорс” ҳимоячиси Лучано Санчеснинг тиззасини синишдан кейин тиклаш бўйича биринчи операцияни ўтказишди, деб хабар бермоқда Diario do Nordeste нашри.
Футболчи 6 август, якшанба куни операция қилинди. Унга 20дан ортиқ металл ўрнатилган. Футболчининг тикланиши учун 12 ойдан 18 ойгача вақт керак бўлади. Шу билан бирга, манбанинг ёзишича, айрим мутахассислар аргентиналик футболчининг футболга қайтиши қийин бўлади, деб ҳисобламоқда.
Санчес 2 август куни Либертадорес кубоги 1/8 финалининг "Флуминенсе"га қарши биринчи ўйинида (1:1) жароҳат олган эди. Бразилиялик ҳимоячи Марсело дриблинг пайтида рақибининг оёғини синдириб қўйди. "Реал"нинг собиқ футболчиси ўз ҳаракати учун тўғридан-тўғри қизил карточка олди ва майдонни йиғлаб тарк этди. Учрашувдан сўнг Марсело рақибидан узр сўради ва тезроқ тузалиб кетишини тилади.
