Словениянинг Марибор шаҳрида шахмат бўйича 8 ёшдан 18 ёшгача бўлган ёш шахматчилар ўртасида ўтказилаётган жаҳон чемпионатида 9-тур ўйинлари бўлиб ўтди.

Саккиз ёшгача бўлган ўғил болалар мусобақасида пешқадамлик қилаётган ҳамюртимиз Нодирбек Абдусатторов 9-турда туркиялик Узумcу Аҳмет Утку билан баҳс юритиб, дурангга имзо чекди. Бугун ўтказиладиган 10-турда Нодирбек энг яқин таъқибчиси мўғулистонлик Батжаргал Ирмунтулга қарши дона суради. Ҳозирча истеъдодли шахматчимиз ҳисобида 9 имкониятдан 8,5 очко мавжуд ва у ҳамон ўз гуруҳида пешқадам бўлиб турибди.

Шу ёшдаги қизлар мусобақасида Юлия Хегай қора доналарда Раттрай Жессиcа (АҚШ) билан баҳс юритиб, у ҳам дуранг натижани қайд этди.

Тўққизчи тур баҳсларида ҳамюртларимиздан Нодирбек Якуббоев (10 ёш), Асал Салимова (10 ёш), ФИДЕ устаси Темур Игонин (12 ёш), Ортиқ Ниғматов (12 ёш), Гулруҳбегим Тоҳиржонова (14 ёш) рақиблари устидан ғалабага эришган бўлишса, Шаварш Бадалян (14 ёш) ва Баҳора Абдусатторова дуранг натижани қайд этдилар.

Тўққизинчи тур ўйинларининг якунларига кўра, Нодирбек Абдусатторов - 8,5 очко, Темур Игонин, Гулруҳбегим Тоҳиржонова - 6,5 тадан очко, Юлия Хегай, Шамсиддин Воҳидов, Нодирбек Якуббоев, АсалСалимова, Ортиқ Ниғматов – 6 тадан очко, Баҳора Абдусатторова - 5,5 очко, Шаварш Бадалян ва Сарвиноз Қурбонбоева - 5 тадан очко, ҳамда Алихон Гусейнов Алихан ва Олег Артеменко - 4.5 очко жамғаришган.

Шавкат Жалилов
Маданият ва спорт ишлари вазирлиги матбуот хизмати