Футбол оддий спорт тури даражасидан чиқиб, ижтимоий борлиққа айланиб улгурган аллақачон. Футбол сиз билан бизни боғлабгина қолмасдан, ўртамиздаги умумийликлар, масалан ватандошлик, инсонийлик, елкадошликни ҳис қилишдаги восита ҳам бўлиб қолди. Биз футбол баҳона ватанимизни янада кўпроқ севишни ўрганамиз, футбол баҳона ўртамиздаги гина-кудуратлар унутилади, футбол баҳона дўстлашамиз ва ҳоказо...

Хуллас, ушбу сайт футбол ва спорт билан чекланса-да, айнан мана шу омил мени ушбу янги блогни очишга сабаб бўлди. Футболдаги маъноси «ўйиндан ташқари ҳолат»ни билдирувчи ушбу блогда, футболдан ташқаридаги биз ҳақимизда суҳбатлашамиз. Блогда менинг муаллифлигимдаги ҳаётий ҳикоялар, ижтимоий мақолалар ўрин олади, ўйлайманки, сизни бефарқ қолдирмайди. Албатта, келажакда бошқа ижодкорлар билан ҳам ҳамкорлик қилишимиз мумкин.

Биласизми, ўзи шундоқ ҳам инсон умри турли синовларга тўла. Ўлимнинг ўзи бир синов. Ҳаётнинг ўзи яна бир синов. Табиий офатлар, тақдир, ризқ, масъулият, умр — шуларнинг ўзи инсонни турли азобларга дучор қилади. Айтмоқчиманки, инсонлар бир-бирларини хафа қилишлари, адоватга боришларига ҳожат йўқ, фақат бир-бирига суянчиқ бўлибгина, бошқа синовлардан омон чиқиш мумкин.

Мана шу рамзий маънода, блогга қўйиладиган илк ҳикоя «Суянчиқ» (ҳаволалар - мобил-версия ва веб-версия учун) деб номланган.

Қаҳрамон Асланов