Ироқлик футболчи Моҳанад Абдулраҳим Каррар ёшлар ўртасидаги Осиё чемпионатининг энг яхши футболчиси деб топилди. Ушбу футболчи мусобақа давомида юқори савияда ўйин кўрсатди ва жамоаси билан финалга қадар етиб бориб, кумуш медалга сазовор бўлди.

Финал баҳсининг 35-дақиқасида Абдулраҳим ҳисобни очди ва бу унинг турнирдаги бешинчи голи бўлди. Лекин ўйиндан кейинги пенальтилар сериясида кореялик дарвозабон Ли Чанг Гуен Каррарнинг зарбасини қайтаришга муваффақ бўлди, Ироқ эса 1:4 ҳисобида мағлуб бўлди.

"Менинг асосий мақсадим, индивидуал совринни эмас, жамоавий совринни қўлга киритиб, жамоадошларим, мураббийлар штаби ва халқимизга қувонч бахш этиш эди. Финалда кўрсатган ўйинимиз бўйича биз ғолибликка муносиб эдик, аммо бу — футбол", дейди ироқлик футболчи Абдуллоҳ ал-Дабал номидаги совринни ОФК вице-президенти, БАА футбол ассоциацияси президенти Юсуф ас-Саркалнинг қўлидан қабул қилиб оларкан.

"Мен бу совринни жамоадошларимга бағишлайман. Ушбу совринни қўлга киритишда улар жанговар кураш олиб боришди. Ишончим комил, келаси йили бўлиб ўтадиган жаҳон чемпионатида яхши ўйин кўрсатамиз. Осиё қитъаси шарафини муносиб ҳимоя қилиб, Ироқ футболини жаҳонга намойиш қиламиз", дейди Моҳанад Абдулраҳим Каррар.